SARIAK LAYUNG DI GUNUNG

Sariak Layung di Gunung

Laras: Pelog                                            Sanggian : Mang Koko

Surupan: 1 = Tugu                   Rumpaka: Dedy Windyagiri


Sariak layung di gunung

Iber pasini patepung lawung

Teuteup jauh ngawangwang nu dipigandrung, Eh…

Ngawangwang nu dipigandrung, aduh..

Harendong meuhpeuy harideung

Jalan satapak rarambu leuweung

Kumalangkang rongheap nu kapitineung,…Eh..

Rongheap nu dipitineung, aduh..

Surya surup layung hibar

Ka tanjakan sawangan diumbar

Geus ngolebat ieuh samar-samar

Hariring asihna kapireng ngalalar

Angin tiis di mumunggang

Katitipan harewos kamelang

Tawis deudeuh ieuh nu maranti

Sungkeman ka heman, saranggeuy malati

SALAM MANIS

Salam Manis

 Laras: Pelog/Degung                     Sanggian: Mang Koko
Surupan: 1=Tugu                           Rumpaka: Winarya Art


Ieu salam manis

Manis salam kuring

Nya ieu pisan nu salawasna nyanding

Nyaring ngahariring

Ieu salam manis

Manis salam kuring

Nya ieu pisan nu salilana nganteng

Anteng kapitineung

Datangkeun kuring deukeutkeun

Deukeutkeun kuring raketkeun

Duh dunungan

Datangkeun kuring deukeutkeun

Deukeutkeun kuring raketkeun

ASIH

Asih

Laras: Pelog/Degung Surupan: 1=Tugu

Sanggian/Rumpaka: Nano S.

Bawa sekar:

Dina kangen kapiraray

Dina ati kapiati

Manteng salira kacipta

Wuwuh endah ngalangkangan

Daya asih, daya asih, daya asih

Nguniangkeun lelembutan

Haliwu ngentringan kalbu

Dina anggang karaos asih teh nganteng

Dina serat karaos galecok sono

Waktos ngobrol karaos tingtrim na ati

Sewu tineung rangkul kangen

Karaos gugeut mamanis

Asih teh sungkeman tresna, asih teh kembangna cinta

Asih teh lagu abadi, asih teh permata ati

Rumaketna hiji jangji

Mipit ati ngolah jaga, daria ngawelah cinta

Ngancik dina sanubari, maneuh dina lelembutan

Manjang asih manjang kangen

Manjang tatali batin

HAREWOS

Harewos

  Laras:Pelog/Degung                              Sanggian/Rumpaka

Surupan: 1= Tugu                                               Nano S.


Hayang ieu lagu tepi kanu dipiati

Tingtrim galindengna ngentringan rasa asihna

Bongan rasa dikukusut

Ku sora reujeung imutna cumantel bae

Geter harewos, kamelang

Ngajak reujeung babarengan

Dina asih anu manjang

Geter katresnan, miheman

Aya asih nu melentis

Eunteup deudeuh ka manehna

Hayang ieu lagu tepi kanu dipiati

Sugan nu dianti bisa ngarti

Hayang ieu lagu

Ngagalindeng na dirina

Nampa asih kuring

Nu miharepkeun cintana

MALATI LEUWI KINANTI

Malati leuwi Kinanti

Laras: Pelog/Degung Surupan: 1=Tugu

Sanggian: Yoyo RW Rumpaka: Dedy Windyagiri

Katumbiri melengkung ti kahyangan

Hujan kembang sumawur ka Pajajaran

Widadari lumungsur muru tampian

Ngadon siram di leuwi Sipatahunan

Dengkleung nineung

Kalangkang mangsa ka tukang

Dengkleung nineung

Silanglang dina panyawang

Dengkleung nineung

Kalangkang mangsa ka tukang

Dengkleung nineung

Silanglang dina panyawang

DI LANGIT BANDUNG BULAN KEUR MAYUNG

Di Langit Bandung Bulan Keur Mayung

Laras: Pelog                               Sanggian: Mang Koko
Surupan: 1=Panelu               Rumpaka: Dedy Windyagriri


Jangjang peuting geus ngalingkup

Ngarungkupan dayeuh Bandung

Anu hibar sinar lampu

Panto ati geus narutup

Mipindingan kawih asih

Anu halon tur halimpu

Geus paanggang geuning urang pajauh

Rek kasaha geuning nyungkem nyaluuh

Nu disungsi geuning nu diteangan

Duh ieuh teu tembong-tembong

Geuning taya ngiberan

Dilalangit langit Bandung

Ngempur hurung bulan keur mayung

Di lelemah lemah Bandung

Kapidangdung kapidangdung

Diri ditundung

BULAN SAPASI

Bulan Sapasi

Laras : Madenda                                      Sanggian/Rumpaka

Surupan: 4=Tugu                                        Gugum Gumbira
Bulan sapasi

Siga nyaksi diri abdi

Pias-pias sagala paningal

Katambias ge panginten

Angin asih nu bihari

Teu deui ngelusan diri

Digentos ku angin bajra

Matak sedih jeung nalangsa

Harepan kiwari ukur harepan

Da bentang di langit masih baranang

Harepan sugan sing jadi putusan

Da engkang masih osok neang datang

Aduh, aduh matak paur

Lamun diri katalanjur

Sanajan diri tinggal sapasi

Alim jadi laip diri

PEUTING NU URANG

Peuting Nu Urang

Laras: Pelog/Degung Surupan: 1=Tugu

Sanggian/Rumpaka: Amas Tamaswara

Peuting eta Enung, peuting nu urang

Sepi jempling, taya soara haringhang

Matak hariwang

Alam endah disanding bulan purnama

Bulan purnama

Simpe jempe matak betah

Ngumbara di pawenangan, di pawenangan

Peuting ieu Enung, kuring kapahung

Sasar lampah henteu puguh nu dijugjug

Ilang tujuan

Natar ngidul milang imah ngitung lembur

Nepi ka tungtung

Malik ngaler mapay tapak

Jog anjog ka gedong peteng, nu poek mongkleng

Peuting nu urang harita datang

Ukur nembongan

Reup sakiceup geus euweuh

Peuting nu urang peuting impian

Inditna bareng jeung datangna cahaya

KAKASIH PUTRI IMPIAN

Kakasih Putri Impian

Laras:  Madenda Surupan: 4=Tugu

Sanggian: Atang Warsita Rumpaka: Syukur Ds

Purbasari Ayu Wangi

Putrid bungsu Galuh nagri

Apingan para Pohaci

Permata Sang Guruminda, kahyangan

Betah-betah keur nyorangan

Nyaung-nyaung dinu singkur duh dinu singkur

Ditundung ku ingkang raka

Nebihkeun tatali asih, kadangwarga

Gunung Cupu semu anu milu ngungun

Rencang satia Lutung Kasarung

Nu iyatna rek bumela raga nyawa

Ka jungjunan Purbasari

Kakasih putrid impian

KURING LEUNGITEUN

Kuring Leungiteun

Laras: Madenda                         Sanggian: Yus Wiradiredja

Surupan 4=Tygu                      Rumpaka: Ir. Zahir Zahri


Leungiteun kuring leungiteun

Dikamanakeun ieu dikamanakeun

Genclang herang

Cikahuripan di leuwi Sipatahunan

Direka na papantunan

Kiwari ngan kari ngaran

Leungiteun kuring leungiteun

Dikamanakeun ieu dikamanakeun

Dongeng endah

Katumbiri taraje langit nu asri

Widadari turun mandi

Lumungsur ti kahyangan

Gusti rumasa diri gagabah

Ngagadabah alam endah kagungan Gusti

Gusti kiwari gunung bulistir

Nu tinggal caah jeung banjir

Ampun Gusti ampun

WUYUNG GANDRUNG

Wuyung Gandrung

Laras: Madenda                                   Sanggian/Rumpaka
Surupan: 4=Tugu                                    Iik Setiawan


Aya naon di salira

Hoyong teh nepangan bae

Aya naon di salira

Kasono taya kendatna

Aya naon di salira

Mun tepang geumpeur rasana

Aya naon di salira

Rek naros sesah kedalna

Da eta imut ngukuntit bae

Da eta teuteup karaos ngan neuteup bae

Da eta deudeuh ngusapan bae

Da eta hate cumantel bae

Wuyung gandrung hoyong tepung

Wuyung gandrung hoyong sing geura kasorang

Hoyong sing geura kabandang

DALINGDING ASIH

Dalingding Asih

Laras: Madenda Surupan: 4=Tugu

Sanggian/Rumpaka Ubun Kubarsyah

Dalingding asih nu kuring

Dalingding asih nu urang

Ngalangkang ngalangkang galeuh lamunan

Ngagalindeng tembang tilam kamelang

Basa kuring arek miang

Anjeun jajap ngahaleuang

Lawung patarema gandrung

Geter rasa cumarita duh kudu paanggang

Dalingding asih jatining ati

Jadi angkeuhan urang duaan

Di pengkolan urang pisah

Ret katukang sumoreang..duh..

Dalingding ngageuri diri

Sorana kantun harewos

Hawar hawar ngajauhan

Teuteup geugeut lir gugupay

Duh tembong deui gupay deui

PUSPITA

Puspita

Laras; Pelog/Degung                               Sanggian/Rumpaka

Surupan: 1 = Tugu                                              Nano S.


Puspita teh kembang

Nu asri dalingding siang

Puspita teh lambang

Nu mangkak ligar dina hate urang

Puspita teh cinta

Nu randakah ku kanyaah

Puspita mustika

Nu medal tina acining kaheman

Waktos saambung dina kembang

Wawangina tumerus na lelembutan

Harita aya geter, waktos damis kagaris

Siak pameunteu nu kapireng wuwuh manis

Dina kembang dilambangkeun cinta urang

Dina lagu dipantengkeun asih urang

Puspita

Jadi lagu pujaan satiap waktu keur urang

NAON LEPATNA

Naon lepatna

Laras: Pelog/Degung                               Sanggian/Rumpaka

Surupan: 1 = Tugu                                              Nano S.


Naon lepatna, naon dosana

Mun diri katarik geter simpati

Kabandang kamelang

Naon lepatna, naon dosana

Mun rasa rumasa, nyimpaykeun tresna

Mikaasih ka dirina

Kapan cinta kedah anteb jeung asihna

Kapan asih kedah tingtrim sumandingan

Sedeng rasa jumajap manteng eunteupna

Demi kasatiaan, janten jejer pamageuhna

Naon lepatna, naon dosana

Nepikeun tungkusan kalbu

Mustika asmara

Naon lepatna, naon dosana

Da niat rek saenyana

Mikaasih ka dirina

NGUMBAR SAWANGAN

Ngumbar Sawangan

Laras: Pelog/Degung Surupan: 1=Tugu

Sanggian: Mang Koko Rumpaka: R. Sukendar K

Paulna langit gumawang dina sawangan

Nanjeur katineung haleuang mapag lamunan

Teuing ku asri hariring datang ti mendi

Kadupak ombak kadupak ombak

Basisir ngalagu ketir

Panyawang labas ka peuntas

Dibarengan ku harewos

Nganteurkeun rasa kawaas

Kareueus ka nu geus ngiles

Panyawang labas ka peuntas

Dibarengan ku harewos

Nganteurkeun rasa kawaas

Kareueus ka nu geus ngiles

SUMEDANG KOTA KAMELANG

Sumedang Kota Kamelang

Laras: Pelog/Degung Surupan: 1=Tugu

Sanggian/Rumpaka Mang Endang

Sungkan miang paturay kudu paanggang

Kota Sumedang muntangan kadeudeuh melang

Surem teuteup ka hareup ku cipanon ngembeng

Naha Enung sumoreang

Pan miang mungkas adegan

Duh Tampomas ulah was-was

Piraku rek udar jangji

Ka konci ku Palasari

Keur Sumedang urang tandang

Ka Ibu Pertiwi urang ngabakti